08 abril 2015

▬ eTwinautas nas cidades (in)visibles

Mª del Carmen Buitrón, profesora no CPI Viaño Pequeno, preséntanos este proxecto galardoado co premio europeo eTwinning 2015:


Tomando como pretexto o libro “As cidades (in)visibles” de Italo Calvino, o colexio CPI Viaño Pequeno (Trazo) e o Klasické a španělské gymnázium de Brno na República Checa, iniciaban en Febreiro de 2013 a aventura dunha viaxe compartida co proxecto etwinning “Matemáticas para viaxar ás cidades (in)sibles”. Foi unha longa travesía que durante seis intensos meses os levou a lugares como Praga, Brno, Telč, Žd'ár nad Sázavou, Český Krumlov, Lednice, Santiago de Compostela, Barcelona, Granada, Toledo, Valencia e Madrid.





Retornados despois desa primeira aventura, decidían buscar novos tripulantes e partir unha vez máis a explorar novos horizontes. Iniciaban esta vez “eTwinautas nas cidades (in)visibles” da man do IES Marc Ferrer de Formentera, o ISIS Oscar Romero de Albino (Italia) e a Malakoff videregående skole de Moss (Noruega) poñendo rumbo a Segovia, Crespi d'Adda, Litomyšl e Bergen. Todos os lugares tiñan un común denominador: seren espazos declarados de interese pola Organización das Nacións Unidas para a Educación a Ciencia e a Cultura (UNESCO); e eles tamén unha común empresa: unir os seus esforzos para descubrir neles “o invisible”.


A viaxe non era unha viaxe corrente, e non era tampouco a viaxe ao fin, senón a escusa. Porque na súa mente non estaba chegar a Ítaca, senón ese transcorrer do camiño. O seu proxecto común, longo, cheo de aventuras, abriulles as portas para coñecer un lugar emblemático do troco de mercadorías como é o porto de Bergen, as memorias do paternalismo industrial en Crespi D'adda, do Imperio romano en Segovia (neste senso, destacan a lectura de “Los Arcos del agua” de Montse Barderi cos membros do alumnado de 3º e 4º de ESO que conforman o Clube de lectura do centro), os desexos de transformar un pobo obreiro en Manhattan, as pegadas da linguaxe musical en Litomyšl e os signos da linguaxe das Matemáticas, da Física, da Química, da expresión artística e literaria... non só dentro senón tamén fóra das aulas, xa non coma entidades inconexas, senón formando un Todo.


Foi esta a Aventura de sacar a aula fóra da aula, de humanizala, de integrala e unha experiencia coa que redescubrirse.

O proxecto foi galardoado con varios premios:
  • SELO DE CALIDADE NACIONAL (REPÚBLICA CHECA)
  • SELO DE CALIDADE NACIONAL (ESPAŇA)
  • SELO DE CALIDADE NACIONAL (ITALIA)
  • PREMIO NACIONAL (REPÚBLICA CHECA)
  • SELO DE CALIDADE EUROPEO